السلام عليكم ورحمة الله وبركاته
ربنا خلق جسم الإنسان بطريقة عجيبة بديعة ، كل حاجة معمول حسابها ، الراحة والتعب ، الداء والدواء ..........
ولإن الإنسان ربنا أعطاه العقل - اللى ميزه بيه عن بقية مخلوقاته - أحيانا بيستخدمه غلط ويجيب التعب لنفسه وبعد كده يسأل نفسه هو انا اللى بيحصلى بيحصلى ليه !!!!! - من أعمالكم سلط عليكم -
زى ما قلت فى العنوان " احذروا الكيتوفان وقرايبه ......................!! " ومش بخص بالاسم الكيتوفان لكن هو وكل قرايبه من المسكنات زى البروفين والفولتارين و.......و....... إلخ.
هل تتصوروا إنهم ممكن يعملو فشل كلوى Renal Failure
مفاجأة ........مش كده ؟؟ بس صدقونى دى حقيقة .
تعالوا نفهم ليه بالراحة وواحدة واحدة واللى ميستوعبش حاجة يقولى !!!
الألم والالتهابات والحرارة والاحتقان والتورمات - اللى أكيد معظمنا حس بيهم - هم عبارة عن مواد بتتخلق داخل الجسم اسمها ProstaGlandins - هى كده معرفلهاش ترجمة - ، المواد دى بتتخلق فى ساعة التعب نتيجى لأى ميكروب أو جسم غريب داخل الجسم أو حتى خبطة.
البروستاجلاندين دى كلمة عامة بتشمل المواد اللى فاتت ونفس الوقت مواد تانية بتخلى الجسم فى كامل صحته وليها فوايد كتير زى :-
فى المعدة :-> بتحمى جدار المعدة عن طريق إنها بتقلل الحمض الموجود فى المعدة وبتزود طبقة المخاط اللى مبطنة الجدار وعازلاه عن الحمض.
فى الكلية :-> بتضبط مقدار الدم اللى رايح للكلية وتنعشها - تزود مقدار الدم - .
على الرحم :-> فى غير الحوامل هى اللى بتسبب الدورة الشهرية وفى الحوامل بتسبب الطلق - الولادة - .
وده على سبيل المثال لا الحصر بس اللى يهمنا فى الكلام دول ........
بالعقل ، عندى حاجة بتوجعنى - وليكن مثلا قصبة رجلى بسبب خبطة - وسبب الوجع ده المواد اللى قلت عليها فى الأول , يبقى عشان أوقف الألم أوقف إنتاج المواد دى ...... ولا فيه حد عنده رأى تانى ؟؟ واللى عنده يقول !!
على طول بتقول الحقونى بكبسولتين كيتوفان ولا حقنة فولتارين .......
حقك ،، إنت راجل بتتألم ومش مستحمل الألم إنك تاخد حاجة تسكن الألم ده ..... بس فين المشكلة ؟؟
إننا بناخده عمال على بطال
زى ما الدوا ده بيوقف المواد اللى بتسبب الألم فى نفس الوقت بيوقف المواد اللى سابق ذكرها كفوائد أساسية للجسم وخد عندك :-
- معظم الأدوية دى - وخاصة الأسبيرين - مع كتر الاستعمال تسبب قرحة ومعظمكم عارف الموضوع ده.
- لو أخذته واحدة حامل قرب ميعاد الولادة لأى سبب بالتأكيد هيعطل تخليق المواد اللى بتسبب الطلق وهتكون النتيجة ....!!!
- لو واحد بقى يا عينى مبيستحملش الوجع خالص ومع أى شوية وجع دماغ أو ضافر صابع رجله الصغير بيوجعه يقوم واخد كبسولتين كيتوفان عمال على بطال ده ممكن يسبب توقف تصنيع المواد اللى بتتحكم فى ضبط مقدار الدم اللى رايح للكلى وبالتالى تعطش الكلى وتدخل فيما يسمى " الفشل الكلوى الصامت Silent Renal Failure "
وعرفت ناس جالهم الموضوع ده بسبب المسكنات ولو تعرفوا إن الكلى بتغسل الدم فى اليوم الواحد حوالى 5 مرات وإن اللى عنده فشل كلوى بيغسل كل يومين مرة أكيد هتخلو بالكم من نفسكم والأهم من ده إننا نشكر ربنا على النعم اللى خلقهالنا وادهالنا فى مقابل حاجة بسيطة جدا , إننا نشكره ونوحده ونعبده ، بس للأسف احنا اللى بنتعب إيدينا بإيدينا.
أتمنى إن الموضوع ينال إعجابكم و ســـــــــــ ســــــــــــ ســــــــــــــــلام ــــــــــــلام ـــــــــــــلام
الأربعاء ديسمبر 24, 2008 8:49 pm
